免費教材 · 香港家長
學校通告嘅日子，直接落 Google Calendar
影低張通告，AI 幫你抽晒重點 —— 要交幾多錢、幾時前要覆、邊個小朋友 —— 然後日子直接入行事曆。設定一次，用成個學年。唔使識 code、唔使畀錢。
問題唔係你唔記得
書包抽張通告出嚟，通常會經歷呢幾步：睇一次 → 諗住等陣入 calendar → 冇入 → 三個禮拜之後先發現回條逾期咗。
真正嘅問題係，由「睇完」到「入咗 calendar」中間隔咗太多步。呢個方法就係壓縮嗰段距離：由六步變成一步。
整好之後係點
掉張通告相入去，收返嘅嘢會分成幾個區塊。用一張真實嘅親子活動通告做例：
📄 一眼睇晒
家字通告第 1 號 · 中秋冰皮月餅 DIY。兩個小朋友都合資格，但以家庭為單位，報一次就得。
📌 我使唔使去
家長要出席 —— 呢個係親子活動。
💰 要交嘅錢
$50 · 以家庭為單位 · 中籤之後先付，9 月 8 日前。繳費後不設退款。
✍️ 要覆／要交
回條 · 9 月 3 日前 · GRWTH 應用程式
🎒 要準備
費用包一份材料，可整四個月餅。如有食物敏感請留意。
⛓ 連環限期
- 9月3日（四） 報名限期
- 9月5日（六） 收中籤通知
- 9月8日（二） 付款 —— 唔付就當放棄
- 9月11日（五） 活動
留意最尾嗰段。呢張通告最容易死喺 9 月 8 日，唔係活動日。光係入咗 9 月 11 日，就算中咗籤都會因為冇付款而冇咗個位 —— 所以「連環限期」要獨立出一段。
三條落 Google Calendar 嘅路
呢度先係成件事嘅重點。抽重點好多 AI 都做到，但落唔到 calendar，你一樣會漏。 三條路唔使全部識，識返最啱你嗰條就夠。
直接叫佢加
如果你部機嘅 Gemini 已經連咗 Google Calendar
處理完通告直接打「幫我加曬」，佢自己開晒啲事件。呢條路 calendar 入面睇到中文，唔使估。
撳連結
手機最方便，一撳一個
每個日子下面有條「加入行事曆」連結。要留意：呢條路嘅事件標題係英文 —— 連結入面一有中文，Gemini 就會當你搜嘢，撳落去變咗搜尋頁。中文重點喺對話度睇返，一樣齊。
一次過匯入
一張通告有五六個日子，用電腦做
打「一次過加曬」，佢會出一個 calendar 檔嘅內容，存做 .ics 再喺 Google Calendar 匯入。一次過入曬，標題有中文，而且自動設定提醒。
容易出錯、要特別處理嘅位
- 學年跨年
- 香港學年由九月到八月。一月收到嘅通告講「九月開學」，指嘅係下一個學年。所以個助手會講返出佢當咗係邊個年份 —— 錯得到你即刻捉到，好過靜靜哋錯。
- 配對邊個小朋友
- 通告好多時印住小朋友個名（尤其 eClass 同回條），用個名認最準。冇印名先靠班別分 —— 「五、六年級補課」就只關六年級嗰個事。
- 通告編號有兩條
- 香港學校嘅「學字通告」同「家字通告」係兩條獨立編號，各自由 1 號數起。淨係講「第 1 號」分唔到邊張，所以要連前面兩個字一齊講。
- 家長使唔使到場
- 同一批通告三個答案：訂校服明寫「家長無須到校」、座談會要預留席位、校外活動要家長陪同。搞錯會白行一趟，所以呢個要獨立答。
- 要交嘅錢
- 除咗銀碼，仲要睇「不設找續」同「不設退款」。要準備啱銀嘅話，臨出門先發現就太遲。
私隱
通告上面有相片、住址、身份證號碼嗰啲，遮咗先影 —— AI 抽日子唔需要呢啲資料。 指令入面亦寫明：小朋友真名只用嚟認邊張通告係邊個，唔會寫入行事曆，事件標題永遠只出英文暱稱。
最後一句要記住：AI 抽嘅嘢係參考。簽名、交錢、請假之前，對返學校原文。AI 睇錯一個數字，你就交錯錢。
攞埋設定教學同指令全文
上面講咗個方法點運作。真正要落手嗰部分 —— 完整指令全文（一撳複製）、 由開 Gem 到填小朋友資料嘅逐步教學、.ics 範本、一人一色嘅進階設定 —— 留個 email 就攞到，唔使設密碼。
攞份教材免費。我哋只會用你個 email 寄呢份教材同新課程通知。